Ракометарите на Алкалоид продолжуваат со успешните настапи во македонската Суперлига, откако во гости го совладаа Бутел со 24-29 во натпреварот од осмото коло. Со тоа, избраниците на Кирил Лазаров ја забележаа седмата сезонска победа, додека домаќините го запишаа седмиот пораз.
Средбата донесе и интересен тренерски дуел меѓу две големи имиња на македонскиот ракомет – Кирил Лазаров и Стојанче Стоилов. На крајот, поуспешен беше Лазаров, чиј тим успеа да ја потврди фаворитската улога.
Алкалоид уште во воведните минути ја презеде контролата врз резултатот, а по десет минути игра имаше предност од 4-8. Сепак, Бутел не дозволи гостите предвреме да го решат прашањето околу победникот, па во продолжението од првото полувреме се обидуваше да ја намали негативата. Домаќините во еден момент се доближија на два гола разлика, но на паузата заминаа со резултат 12-15.
Во вторите 30 минути Алкалоид продолжи да го контролира текот на натпреварот. Гостите постепено ја зголемуваа предноста и во еден момент стигнаа до плус пет, со што направија значаен чекор кон освојување на бодовите. Бутел се обиде да се врати во игра, но „фармацевтите“ не дозволија изненадување и сигурно го приведоа дуелот до крај.
Второто полувреме заврши со 12-14 во корист на Алкалоид, кој на крајот славеше со 24-29 и заслужено се радуваше на нов триумф.
Во победничкиот состав најефикасен беше Урош Борзаш со пет погодоци, додека Дамјан Митев постигна четири гола. Кај Бутел, Лука Јовиќ и Марко Каевски се истакнаа со по пет погодоци.
Во следното коло Алкалоид ќе го пречека Прилеп и ќе има можност да ја продолжи победничката серија, додека Бутел ќе се соочи со Мулти Есенс во обид за прв сезонски триумф.
