Ракометарите на Охрид продолжуваат со сигурните настапи во домашниот шампионат, откако на свој терен убедливо го совладаа Еурофарм Пелистер 2 со 35-19. „Гладијаторите“ уште во првото полувреме ја најавија победата, а со одличната игра пред своите навивачи стигнаа до нови бодови и го задржаа местото меѓу четирите водечки екипи во Супер лигата.
Избраниците на Ројевиќ, уште од почетните минути ја презедоа контролата врз натпреварот. По почетните 4-0, домашниот состав постепено ја зголемуваше предноста, а серијата од 6-1 во првиот дел му овозможи да се одлепи на убедливи 14-5. Охриѓани не застанаа тука, па на одмор заминаа со двоцифрена предност од 21-9.
Ниту продолжението не донесе промена на односот на силите. Иако гостите во еден период се обидоа да ја намалат негативата, Охрид одговори со нови голови и без поголеми проблеми го приведе мечот кон крајот. Адама Кеита и Никола Зечевиќ беа најдобри стрелци кај победничкиот тим со по шест погодоци, додека Шуичи Јошида и Доминик Мате постигнаа по пет. Кај битолчани најрасположен беше Кристијан Симоновски со шест гола.
Голманот на Охрид, Дино Славиќ, кој натпреварот го заврши со девет одбрани, во изјава за Спортска Мрежа, истакна дека екипата и покрај напорниот распоред успеала да одговори на предизвикот и да ја оправда фаворитската улога.
„По два натпревари во два дена во Европскиот Куп, немавме многу време за опоравување. Знаевме дека Еурофарм Пелистер 2 е млада екипа, која многу трча и дека мораме добро да се подготвиме. Мислам дека многу добро го отворивме натпреварот, уште на самиот почеток тргнавме добро. На крајот победивме со 16 гола разлика. Мислам дека победата ниту во еден момент не беше доведена во прашање. Сите сме задоволни и, еве, сега го чекаме следниот натпревар.“- изјави Славиќ за Спортска Мрежа.
Со овој триумф Охрид стигна до 13 бода и останува на четвртата позиција на табелата, во друштво на водечката четворка. „Гладијаторите“ сега го насочуваат вниманието кон следните предизвици, со желба да ја продолжат победничката серија и да останат во трката за највисок пласман.
