Пелистер ја има најдобрата одбрана во Втората македонска фудбалска лига по девет одиграни кола. Битолчани досега примиле само еден погодок, а голманот Натаниел Димовски е без примен гол цели 720 минути, со осум натпревари на кои ја зачувал својата мрежа недопрена.
8 натпревари – 8 чисти мрежи за Димовски!
Одбранбената стабилност е еден од главните адути на Пелистер во досегашниот тек од сезоната. Со само еден примен погодок на девет натпревари, битолскиот тим потврдува дека располага со одбрана која тешко се пробива, а серијата без примен гол претставува значаен придонес во борбата за врвот на табелата.
Покрај одличната дефанзивна статистика, Пелистер има и одличен бодовен учинок. Со освоени 21 бод, битолчани се на второто место на табелата, со само еден бод помалку од лидерот Охрид, па трката за врвот останува целосно отворена.
Следниот предизвик за Пелистер е натпреварот од десеттото коло, во кој битолчани ќе ја пречекаат екипата на Детонит Плачковица. Пелистер ќе се обиде да ја продолжи победничката серија и да ја зачува одличната дефанзивна статистика.
