Македонските одбојкарски репрезентативки и интернационалки Ерјона Јонузи и Андротеа Милевска в четврток ги очекуваат настапи со своите нови клубови во првото коло од ЦЕВ Челинџ купот.
Организаторот на играта Јонузи, која сезонава го носи дресот на словачкиот шампион Слован Братислава, европскиот настап ќе го започне со дуел против црногорскиот тим Будуќност Подгорица. Првиот натпревар ќе се одигра во салата „Гопас“ во Братислава, каде што словачкиот состав ќе ја има предноста на домашниот терен.
Јонузи и нејзините соиграчки со одлична форма го најавуваат почетокот на европските предизвици. Слован има максимален ефект во домашното првенство, со пет победи на првите пет натпревари од сезоната.
Коректорот Андротеа Милевска, пак, од оваа сезона настапува за романскиот ЧСМ Букурешт, со кој европската авантура ќе ја започне на гостувањето кај грчкиот Панатинаикос во Атина.
Почетокот на сезоната во Романија засега не е според очекувањата за тимот на Милевска. ЧСМ Букурешт во првото коло од националниот шампионат загуби од Волунтари со 3:1, додека во второто коло беше слободен. Романскиот тим претрпе и пораз од 3:0 од Констанца во првиот натпревар од првото коло во романскиот Куп.
Од македонските интернационалки, успешен почеток на сезоната има и Ана Фасулева, која настапува за албанскиот клуб Тирана. Нејзиниот тим има максимален ефект од три победи во три натпревари, остварени со резултати од 3:2, 3:0 и 3:1. Последниот триумф Тирана го забележа викендов во дербито против Динамо.
