Вардар во среда го очекува последниот предизвик во овогодинешното издание на Лигата на шампионите. „Црвено-црните“ ќе го пречекаат Мелсунген во „Јане Сандански“, со желба европскиот настап да го завршат со победа пред своите навивачи.
Тренерот Иван Чупиќ нагласи дека дуелот со германскиот состав има посебно значење за тимот, особено по двата домашни порази во елитното натпреварување. Вардар сака да им се оддолжи на навивачите за поддршката и да ја продолжи победничката серија.
„Моето размислување е многу едноставно. По двата пораза во ‘Јане Сандански’, сега станува збор и за нашата гордост и чест. Оваа сала и нашите навивачи, кои нè поддржуваа на највисоко ниво на двата домашни натпревари во Лигата на шампионите, заслужуваат да го завршиме настапот со победа. Сакаме да победиме не само за клубот и да ја продолжиме победничката серија, туку пред сè за да им возвратиме на навивачите – луѓето што секогаш се зад нас и постојано ни даваат дополнителна сила.“- изјави Чупиќ.
Со победата над Нант во Франција, Вардар покажа дека може да се надигрува со најдобрите, а Чупиќ посакува уште еден триумф пред продолжението на сезоната во домашното првенство, регионалната лига и ЕХФ Европската лига.
