Брегалница доби нов тренер на голмани, откако Дарко Денков се приклучи во стручниот штаб на Мијалче Прошев со што 36-годишниот штипјанец кариерата ја продолжува во таборот на „сините“.
Денков во изминатите сезони работеше во второлигашот Детонит Плачковица, а сега ќе има предизвик во редовите на прволигашот Брегалница.
Во изминатите години Денков изгради репутација на посветен и квалитетен тренер на голмани, препознатлив по работата со млади и перспективни чувари на мрежата. Покрај клупските обврски, тој е дел и од специјализиран голмански камп на кој учествуваат талентирани голмани од целиот Балкан, каде активно го пренесува своето знаење и искуство.
„Со голема чест и одговорност ја прифатив довербата да бидам дел од стручниот штаб на ФК Брегалница, како тренер на голманите. Голема благодарност до целокупното раководство на клубот за укажаната доверба, како и до сите што веруваат во мене и мојата работа. Брегалница е повеќе од клуб – таа е бренд, традиција и дел од мене“, вели Денков.
