Охриѓанецот Наум Костов одигра натпревар за паметење во дресот на Куманово и со неверојатна реализација се најде во центарот на вниманието во второто коло од Супер лигата.
Десното крило беше безгрешно против актуелниот шампион Вардар 1961, постигнувајќи 15 погодоци од исто толку и обиди. Иако неговиот тим не успеа да стигне до бодовите, „црвено-црните“ славеа со тесни 32-30, Костов беше убедливо најопасниот поединец на теренот.
За 23-годишниот ракометар ова беше продолжение на одличниот старт на сезоната. На премиерниот натпревар против Прилеп реализираше 8 од 9 удари, па по две кола има неверојатни 23 гола од 24 обиди.
Со ваквата статистика, Костов моментално е прв стрелец во Супер лигата, а неговата 100-процентна реализација против Вардар е досега највпечатливата индивидуална партија на стартот од сезоната.
Охриѓанецот испрати јасна порака уште на почетокот на сезоната – неговото име сериозно ќе се следи и во продолжението од шампионатот.
