Четири натпревари од Супер машката лига донесоа очекувани победи на фаворитите, но дел од нив мораа добро да се испотат за да стигнат до планираните бодови. Еурофарм Пелистер, Алкалоид, Вардар 1961 и Тиквеш 2014 го освоија полниот плен во ова коло.
Еурофарм Пелистер на домашен терен славеше над Мулти Есенс со 38-27, но резултатот не ја отсликува целосно сликата од првото полувреме. Гостите одлично го отворија натпреварот и до 18. минута имаа предност, во еден момент и од четири гола. Битолчани постепено го презедоа ритамот, до паузата поведоа со 18-14, а во продолжението без поголеми проблеми ја контролираа предноста. Белистојаноски со осум погодоци беше најпрецизен кај победникот, додека Кајалџиоски и Атанасијевиќ постигнаа по шест.
Алкалоид, пак, мораше сериозно да се намачи за да ги освои бодовите во Битола. Тимот на Кирил Лазаров го совлада Еурофарм Пелистер 2 со 31-27, во меч во кој младите домашни ракометари долго беа рамноправен противник. По 10-11 на полувремето, Алкалоид во вториот дел успеа да направи разлика, но домаќините не се откажуваа и во финишот повторно се доближија. Искуството на гостите сепак дојде до израз во клучните моменти. Симоноски со девет гола беше најдобар кај Пелистер 2, додека Митев постигна шест за Алкалоид.
Вардар 1961 од гостувањето кај Куманово се врати со победа од 32-30. „Црвено-црните“ го контролираа поголемиот дел од натпреварот и во првото полувреме во еден момент имаа и седум гола предност. Во продолжението, со ротациите на вардарската клупа, Куманово успеа да се врати во мечот и во самиот финиш да намали на само еден гол разлика. Сепак, Митровиќ со погодок во последната минута ги реши дилемите. Наум Костов беше убедливо најефикасен кај Куманово со 15 гола, додека Тузолама и Фадуил постигнаа по шест за Вардар.
Најмногу голови во колото имаше во Кавадарци, каде Тиквеш 2014 го совлада Бутел Скопје со 38-33. Гостите имаа подобар период во првата половина од првиот дел и дури поведоа, но домаќините со серија од пет гола ја презедоа контролата и на одмор заминаа со четири гола предност. Бутел успеа да ја преполови негативата во продолжението, но не најде решение за повторно да се врати во целосен егал. Димовски со осум гола беше прв стрелец кај Тиквеш, додека Јаневски со седум погодоци беше најдобар кај гостите.
Четирите фаворити така стигнаа до нови бодови, но колото донесе и неколку интересни пресметки во кои резултатот не ја покажува целосно борбата што се водеше на теренот.
