Охрид останува со максимален ефект во Регионалната лига. „Гладијаторите“ вечерва славеа на гостувањето кај Динамо Панчево со 30-28 и го завршија регионалниот мини-серијал со три победи од три натпревари.
Домашниот тим имаше предност на полувремето од 15-13 и во првиот дел во неколку наврати водеше со четири гола, но Охрид направи пресврт по паузата. Избраниците на Борис Ројевиќ постепено ја презедоа иницијативата и со серија подобри минути стигнаа до водство од 22-19.
Панчево не се предаде и успеваше да се приближи, но охриѓани во клучните моменти беа поконцентрирани. При 28-26, Дино Славиќ со важна одбрана му овозможи на својот тим да го задржи водството, а Стрмљан потоа погоди за 29-26 и го трасираше патот кон новиот триумф.
Најефикасен кај Охрид беше Доминик Мате со осум гола, Стрмљан постигна пет, додека Савревски и Кеита запишаа по четири.
Охрид со три победи го затвора настапот во Регионалната лига, а следниот голем предизвик за „гладијаторите“ е Супер купот против Вардар.
