Новата ракометна сезона во Македонија ќе започне со голем натпревар за трофеј. Вардар 1961 и Охрид ќе се соочат во битката за Суперкупот на Македонија, а домаќин на дуелот ќе биде Гевгелија.
Натпреварот е закажан за 2 септември (среда) во спортската сала „26 Април“, со почеток од 19:00 часот. РФМ одлучи борбата за првиот сезонски трофеј да се одигра на неутрален терен, па љубителите на ракометот во Гевгелија ќе имаат можност да проследат вистинско дерби.
Вардар во новата сезона влегува со амбиции за освојување на домашните трофеи и настапи на европската сцена, додека Охрид по одличниот период и успешните настапи во изминатата сезона ќе има можност да покаже дека може да се надигрува со најдобрите македонски екипи.
За Гевгелија ова ќе биде второ домаќинство на Суперкупот во последните неколку години. Градот веќе беше домаќин на ова натпреварување во 2024 година, кога Алкалоид го совлада Еурофарм Пелистер и го освои трофејот.
Дуелот меѓу Вардар и Охрид воедно ќе биде и прва официјална можност за двата тима да ги покажат своите амбиции пред стартот на новата сезона.
Информациите за продажбата на билетите и онлајн набавката организаторите дополнително ќе ги објават.
Сè е подготвено за ракометен спектакл во Гевгелија – Вардар или Охрид, кој ќе го освои првиот трофеј во сезоната?
