ВИДЕО: Шкендија остана без реми во самиот финиш, Хибернијан со минимална предност доаѓа на реваншот во Скопје

Македонскиот вицешампион Шкендија ќе има активен резултат пред реваншот од третото квалификациско коло во Конференциската лига, откако на гостувањето во Единбург загуби со 2-1 од Хибернијан. Тетовци беа на чекор да се вратат со реми, но шкотскиот состав до победата стигна во судиското продолжение.

Избраниците на Артим Положани одиграа дисциплиниран и тактички зрел натпревар, особено во првото полувреме кога успешно ги неутрализираа нападите на домаќинот. Хибернијан имаше повеќе посед на топката и иницијатива, но Шкендија организирано се бранеше и не дозволуваше сериозни закани кон својот гол.

Во продолжението домашниот тим го засили притисокот, а отпорот на Шкендија беше скршен во 73. минута. Рајт продре по левата страна и испрати употреблива топка во казнениот простор, каде Елдинг од прва ја затресе мрежата за водство од 1-0.

Македонскиот претставник експресно возврати. Само три минути подоцна, резервистите ја одиграа клучната улога – по одличната асистенција, Марко Ѓорѓиевски уште еднаш покажа дека знае да погодува во важни моменти и донесе израмнување на 1-1, враќајќи ја Шкендија во игра за поволен резултат.

Кога изгледаше дека натпреварот ќе заврши без победник, Хибернијан стигна до триумф. По изведен корнер во судиското продолжение, топката по мешаница во шеснаесетникот стигна до О’Хора, кој од непосредна близина ја испрати во мрежата за конечни 2-1.

И покрај болниот пораз во самиот финиш, Шкендија останува со реални шанси за пласман во плеј-офот. Минималната негатива остава простор за пресврт, а реваншот на арената „Тодор Проески“ ќе биде нова можност тетовци пред својата публика да ја надоместат разликата и да продолжат во европската авантура. Победникот од двомечот ќе се соочи со подобриот од пресметката меѓу Гетеборг и Гент.