Македонската тенисерка Лина Ѓорческа го заврши настапот на W75 турнирот во Лајпциг, Германија, откако го предаде мечот од второто коло против чешката тенисерка Алена Ковацкова. Натпреварот заврши при водство на Ковацкова од 1-0 во сетови и 2:1 во гемови во вториот сет.
Ковацкова убедливо го освои првиот сет со 6:1, откако поведе со 5:0. Ѓорческа подобро го започна вториот сет и по долга борба, во која беа одиграни 14 поени, го освои првиот гем за 1:0. Сепак, Чехинката ги освои следните два гема за пресврт и водство од 2:1, по што македонската тенисерка го предаде мечот.
За Ѓорческа ова беше втор меч на турнирот во Лајпциг, откако во првото коло ја совлада Украинката Анастасија Фирман со 2:1 во сетови.
Следната недела македонската тенисерка е пријавена за настап на турнирот во Куршумлијска Бања.
