Историски ден за спортот во општина Конче. 4 септември 2026 година ќе остане запаметен како денот кога за првпат во историјата на оваа рурална општина започна да се тренира ракомет.
РК Феникс официјално го прошири своето дејствување и во општина Конче, каде што во спортската сала при ООУ „Гоце Делчев“ се одржа првиот собир и првиот тренинг. Почетокот помина во позитивна атмосфера, со голем број насмеани и среќни деца, голем интерес и огромна желба за запознавање со новиот спорт.
Со отворањето на ракометната школа во Конче, најмладите од општината добиваат уште една можност за активно спортување, дружење, развој и создавање здрави спортски навики.
Од РК Феникс упатија голема благодарност до градоначалникот на општина Конче, Златко Ристов, до Советот на Општина Конче, како и до сите родители за поддршката и до децата кои станаа дел од семејството на клубот.
Општина Конче останува посветена на развојот на спортот, додека РК Феникс најавува посветеност кон создавање успешна ракометна приказна и развој на младите таленти.
Вратите на РК Феникс во Конче се отворени за сите дечиња кои сакаат да тренираат ракомет, да спортуваат и да бидат дел од клубот, без разлика кога ќе одлучат да се приклучат.
Така, во Конче започнува едно ново поглавје – нови почетоци, нови генерации и нова ракометна приказна.
