Дваесет и пет годишниот американскиот плејмејкер Ноа Фарахан (висок 185 см) и официјално е нов кошаркар на МЗТ Скопје, откако денеска потпиша договор со актуелниот македонски шампион.
Фарахан зад себе има успешна дебитантска сезона во Европа. Настапуваше за босанските Студент, Игокеа и Борац Бања Лука, а сезоната ја заврши во словачкиот прволигаш Комарно. Универзитетската кариера ја градеше во САД, настапувајќи за Источна Каролина, Вест Вирџинија и Хемптон Пајратс.
Минатото лето беше дел и од Летната НБА-лига, каде што одигра четири натпревари во дресот на Сан Антонио Спарс, дополнително потврдувајќи го својот квалитет и потенцијал.
Македонската кошаркарска јавност добро го памети неговото издание токму против МЗТ Скопје во АБА2 лигата, кога постигна 27 поени и запиша седум асистенции.
Фарахан е второто странско засилување на МЗТ Скопје во пресрет на новата сезона, по ангажманот на босанскиот центар Емир Крајиниќ. Под договор со клубот се и Дамјан и Војдан Стојановски, Андреј Маслинко, Андреј Андоноски, како и повратниците Лука Стојановски и Никола Василевски, додека на клупата и понатаму ќе седи Васко Атанасов.
Во сезоната 2026/27, МЗТ Скопје ќе се натпреварува во домашниот шампионат, АБА2 лигата и ФИБА Еврокупот.
