Машката јуниорска репрезентација на Македонија ја запиша првата победа на Европското првенство од Дивизијата „Б“ во Хрватска, откако во директниот дуел за четвртото место во групата „Д“ ја совлада селекцијата на Шведска.
По трите порази во групната фаза, македонските јуниори покажаа карактер, борбеност и тимски дух кога беше најпотребно. Со заслужената победа изборија пласман во разигрувањето за позициите од 9. до 16. место.
Првото полувреме донесе изедначена игра, а Шведска на паузата замина со минимална предност од 31:30. Во продолжението, избраниците на стручниот штаб значително го подигнаа нивото на играта. Со агресивна одбрана, сигурен напад и голема енергија, Македонија целосно го презеде ритамот на натпреварот. Клучен беше третиот период, во кој нашите кошаркари создадоа предност што успешно ја зачуваа до самиот крај.
Во последната четвртина Македонија одигра зрело и дисциплинирано, не дозволувајќи им на Швеѓаните да се доближат резултатски. Така, сосема заслужено стигна до првиот триумф на шампионатот.
Капитенот Григориј Ѓорѓевиќ повторно беше предводник на тимот и беше на чекор до трипл-дабл учинок. Натпреварот го заврши со 17 поени, 11 асистенции и осум скока. Одличен придонес дадоа и Цветковски со 12 поени, Малиниќ со дабл-дабл од 11 поени и 10 скока, како и Данев, кој постигна 10 поени.
По денот за одмор, македонските јуниори ги продолжуваат настапите на Европското првенство во борбата за што подобар конечен пласман, со надеж дека ќе го задржат победничкиот ритам.
