МЗТ Скопје продолжува со комплетирањето на тимот за претстојната сезона, а најново засилување во составот е српскиот плејмејкер Тадија Тадиќ.
27-годишниот бек, висок 194 сантиметри, во „Јане Сандански“ пристигнува со богато регионално и меѓународно искуство. Тадиќ својата кариера ја започна во белградски Партизан, со кого во 2018 година го освои Купот на Србија.
Во 2022 година, настапувајќи за Златибор, се закити со шампионската титула во АБА2-лигата, а има искуство и од настапи за Младост Земун, Слобода Ужице и унгарски ДЕАЦ.
Тадиќ добро го познава и македонскиот и регионалниот кошаркарски простор, со оглед на тоа што во минатото настапуваше за Куманово, како и за црногорската Сутјеска.
Новиот член на МЗТ Скопје има и репрезентативно искуство со младинските селекции на Србија. Со јуниорската репрезентација го освои златниот медал на Европското првенство во 2017 година, а претходно беше дел и од селекциите до 16 и до 20 години.
Со својата прегледност, организаторски способности и искуство, Тадиќ треба да донесе дополнителна сигурност и креативност во бековската линија на македонскиот шампион, кој во новата сезона ќе настапува на домашната сцена, во АБА2-лигата и во ФИБА Европа.
