Во четврток Втората македонска фудбалска лига може да добие нов лидер, но истовремено одложените натпревари од второто коло може дополнително да ја усложнат ситуацијата за неколку екипи.
На програмата се два натпревари – Детонит Плачковица – Охрид во Радовиш и Тетекс – Работнички во Тетово. Двата дуели носат голема тежина, како за врвот на табелата, така и за екипите кои сакаат да го прекинат негативниот резултатски период.
На Градскиот стадион во Радовиш, Детонит Плачковица го пречекува Охрид во натпревар од големо значење за двата тима. Радовишани влегуваат во дуелот по два последователни порази – од Новаци со 3:1 и од Камјани со минимални 1:0.
По таквиот старт, домаќинот е под резултатски притисок и ќе мора да бара позитивен исход, а особено победа, за да не влезе во серија од три порази и дополнително да ја усложни својата ситуација.
Од другата страна, Охрид во Радовиш ќе брка враќање на победничкиот пат и повторно искачување на врвот. „Рибарите“ во последното коло загубија со 1:0 од Пелистер, па триумф на ова гостување би им овозможил повторно да се најдат на лидерската позиција.
Интересно ќе биде и во Тетово, каде Тетекс ќе го пречека Работнички. „Штофарите“ досега запишаа еден триумф, а по истиот поразот и двете ремија, па домашниот терен ќе сакаат да го искористат за втора победа во сезоната и исчекор кон горниот дел од табелата.
Работнички, пак, во натпреварот влегува со позитивна атмосфера по победата над Македонија ЃП. „Романтичарите“ ќе се обидат да врзат два триумфи и да стигнат до вкупно четири победи, со што би дошле до 12 бодови и би се искачиле високо на табелата.
Дополнителна тежина на ситуацијата ѝ дава фактот што Работнички има уште еден заостанат натпревар, против Брера Струмица. Доколку ги освои бодовите од двата одложени натпревари, тимот може сериозно да се вмеша во борбата за самиот врв, каде што би можел да се израмни со Охрид со по 15 бодови.
Затоа, четврток носи 90 минути со голем влог во Радовиш и Тетово – едни ќе бркаат излез од кризата, други ќе атакуваат на врвот, а табелата по овие два натпревари може да изгледа значително поинаку.
