Новиот суперлигаш ГКК Штип 1933 продолжува активно да го составува тимот за историскиот настап во елитното друштво, а најново име во ростерот е американскиот крилен центар Даниел Хенкинс-Санфорд.
Хенкинс-Санфорд во Штип пристигнува со сериозно колеџ-искуство од САД. Висок е 203 сантиметри, а во досегашниот развој настапувал за Јужна Каролина и ЈуМес, каде што во сезоната 2025/26 имал значајна улога во тимот.
Американецот минатата сезона настапи на сите 30 натпревари, секогаш како стартер, со просек од 11,3 поени и 7,1 скок по натпревар. Неговите физички предиспозиции и играта под обрачите треба да донесат дополнителна конкуренција и квалитет во штипскиот состав.
Од ГКК Штип потврдија дека со ангажманот на Хенкинс-Санфорд продолжуваат да го градат тимот за предизвиците кои ги носи првата сезона во Суперлигата.
За штипјани, пак, возбудувањата во новата сезона ќе започнат на домашен терен. ГКК Штип 1933 ќе ја отвори сезоната во Суперлигата во новата сала „Џексон“, каде што за противник ќе го има составот на Тиквеш од Кавадарци.
Така, новиот американски интернационалец ќе биде дел од ростерот кој ќе има задача премиерниот суперлигашки предизвик да го дочека подготвен, воедно со можност пред домашната публика да го започне патот во најсилното македонско кошаркарско друштво.
