Нов голем чекор во европската судиска кариера на Ивана Пројковска. УЕФА ѝ ја довери правдата на едно од најинтересните соочувања во првото коло од женската Лига на шампионите – дуелот меѓу Реал Мадрид и Пари Сен Жермен.
Средбата меѓу актуелните шампиони на Шпанија и Франција ќе се одигра на 22 септември во Мадрид, на стадионот „Алфредо Ди Стефано“, а Пројковска ќе биде главен судија на европското дерби.
Ова делегирање претставува уште една потврда за нејзиниот статус во европскиот фудбал. Пројковска е меѓу 20-те елитни женски судии кои се наоѓаат на листата на УЕФА, а довербата за ваков натпревар доаѓа по нејзиниот настап на неодамнешниот семинар во Женева, каде што беа присутни најдобрите европски судијки.
Македонската судијка нема да биде сама на „Алфредо Ди Стефано“. Во судиската екипа ќе биде и нејзината сонародничка Елена Соклевска-Илиевска, што е уште една потврда за големиот квалитет кој го има и Соклевска-Илиевска, која ќе асистира на Пројковска, додека асистент ќе биде и Дијана Варага Араја од Литванија. Улогата на четврта судијка ѝ припадна на Хрватката Сабина Болиќ, а контролор на судењето ќе биде Германката Кристина Батингер.
За Пројковска ова е уште едно значајно делегирање на највисоко европско ниво и можност повторно да биде дел од голем фудбалски спектакл. Дуелот во Мадрид носи големо внимание, а Пројковска ќе дели правда меѓу два европски гиганти, мечот се игра утре во 21 часот.
