Фудбалската федерација на Македонија официјално го започна процесот за пријавување на екипите кои сакаат да настапуваат во Втората футсал лига во натпреварувачката сезона 2026/2027.
Право на учество имаат сите заинтересирани футсал клубови кои ги исполнуваат условите предвидени со Статутот, Правилникот за натпреварување и останатите прописи на ФФМ. Пријавите, заедно со целокупната потребна документација, треба да бидат доставени во архивата на Фудбалската федерација на Македонија најдоцна до 1 август 2026 година, согласно рокот утврден од Комисијата за футсал.
Минатата сезона шампион во Втората футсал лига беше екипата на Железарец, која експресно се врати во елитното друштво, додека второто место го освои СЕЕ Универзити од Тетово, кој исто така обезбеди пласман во Првата футсал лига.
Во спротивен правец, од Првата футсал лига испаднаа Балкан и Мал Ајакс, кои во сезоната 2026/27 ќе се натпреваруваат во второлигашката конкуренција.
Со отворањето на пријавите започнуваат подготовките за новата сезона во Втората футсал лига, а во наредниот период ќе биде познат и конечниот список на клубови кои ќе бидат дел од натпреварувањето.
