Тоа што го најави Спортска Мрежа во текот на вчерашниот ден доби на потврда, македонскиот репрезентативец Марио Благојевски останува во шампионот Проект и во сезона 2026/2027.
Популарниот „Џемо“ ќе тресе мрежи за тимот од Јосифово и во новата сезона, со неговото искуство Проект веќе од овој викенд ја започнува одбраната на двојната круна.
„Некои приказни не завршуваат — само добиваат ново поглавје. Со огромно задоволство го пречекуваме Марио Благојевски повторно во семејството на Проект! Марио повторно е дел од тимот и заедно продолжуваме кон нови предизвици и победи“, велат од клубот.
Благојевски, кој има 29 години, го имаше своето деби и во Лигата на шампион во Грац, Австрија, а во Проект пристигна во октомври 2025 година. Претходно, за овој тим настапуваше и во период од септември 2022 до јануари 2025 година.
Поддржете го независното спортско новинарство. Донирајте за Спортска Мрежа
Настапуваше и за Форца од Куманово и Железарец, а во големиот фудбал кариерата ја започна во Марино, беше дел од Металург, Кадино, Илинден, Мралино, Македонија ЃП, Пчиња и Бујковци.
Меѓународна кариера како футсал играч градеше во Косово во екипата на Вјоса.
Тренерот на Проект, Игор Димов, со потврда на Благојевски и за следната сезона добива значителен квалитет, а намерата на Проект е јасна – одбрана на двојната круна.
