По четири одиграни кола во Трета лига регион 3 има неколку екипи кои во целост разочараа, ако се земе предвид фактот со какви амбиции ја започнаа сезоната. Но, покрај разочарувањата има и едно вистинско изненадување.
Овче Поле и Каменица Саса во целост потфрлија, иако нивните амбиции пред стартот на сезоната беа прво место и Втора лига.
Овче Поле минатата сезона не успеа да стане шампион, годинава најави високи амбиции и освојување на првото место и со тоа обезбедување на баражот, но не тргна според планот, а најтежок удар е минималниот пораз на домашен терен од лидерот и лански шампион Победа Валандово.
Ланскиот второлигаш Каменица Саса во слична ситуација потфрли и моментално е бодовно далеку од „калинкарите“, кои го држат врвот од табелата со максимални 12 бодови.
Слога Виница по експресното испаѓање од Втора лига по четири кола во Трета лига регион 3 собра само еден бод од можни 12 и во конкуренција на дванаесет екипи е на десеттото место.
Најмногу разочара дефинитивно Тиверија од Струмица, клубот кој има богата историја и традиција по четири кола има примено дури 37 гола, а постигна само два.
Во првото коло Тиверија загуби од Овче Поле со 11:0, а потоа на домашен терен беше декласирана од Дојранско Езеро со 0:13, додека пак во Третото коло не го одигра мечот со Малеш од Берово и истиот го загуби со службени 3:0. Во рамки на четвртото коло Тиверија беше декласирана и од Хоризонт Турново во локалното дерби со 2:10.
Хит во шампионатот е дебитантот Огражден од Ново Село, кој по четири кола има три победи и едно реми и со десет бодови е на второто место, само минус два од лидерот од Валандово.
Екипата на Победа која минатата сезона не успеа да го помине баражот за Втора лига, откако загуби во Штип со 2:0 од шампионот на Трета лига – Запад, Камјани, има одлично отварање на сезоната – целта е нов бараж за Втора лига со среќен крај и пласман во повисок ранг на натпреварување.
Сепак ова е само почеток на шампионатот, одиграни четири кола, има уште многу борба на теренот и натпревари кои ќе носат промени на табелата. Но, првичната слика даде одреден показател дека некои екипи само си го закомплицираа патот кон остварување на целите, а тоа може на крајот да биде и клучно.
- ЦЕЛА ТАБЕЛА ОД ТРЕТА ЛИГА РЕГИОН 3:
