Македонските фудбалски љубители ќе имаат можност во живо да го проследат реванш натпреварот меѓу Силекс и Динамо Минск од првото квалификациско коло во Конференциската лига на УЕФА. Дуелот ќе биде емитуван во директен пренос на телевизискиот канал Арена М1 Премиум.
Кратовчани во реваншот влегуваат со голема самодоверба, откако на првиот натпревар славеа со минимални 1:0 против белорускиот претставник. Натпреварот се одигра во Бугарија, каде Динамо Минск беше формален домаќин, а избраниците на Александар Васоски направија важен чекор кон пласманот во следната квалификациска рунда.
Реваншот ќе се одигра на 16 јули на тренинг-центарот на ФФМ „Петар Милошевски“ во Скопје, со почеток од 20:00 часот.
Интересот за овој натпревар е огромен, што го потврдува и фактот дека сите билети беа распродадени неколку дена пред одигрувањето на средбата. За оние кои нема да бидат на трибините, директниот ТВ-пренос на Арена М1 Премиум ќе биде можност да ја следат европската битка на Силекс.
Доколку кратовскиот тим успее да ја зачува предноста и да го елиминира Динамо Минск, во второто квалификациско коло од Конференциската лига ќе се сретне со азербејџански Нефчи Баку.
