Младиот каратист Марко Џорлев го освои златниот медал на Светската младинска карате лига во Пореч, Хрватска, во конкуренција на кадети до 63 килограми, со што го запиша најголемиот успех во својата кариера.
На патот до светската титула, Џорлев имаше речиси беспрекорен настап во силна конкуренција, каде најпрво се соочи со Педро Мораиш од Португалија и славеше со 2-0, по што следуваше доминантна победа над Дањел Нешковиќ од Германија со 7-0. Во третата борба повторно беше убедлив, совладувајќи го Рене Пирчак од Словачка со 3-0, додека во следната фаза против Марко Савиќ од Србија стигна до триумф од 2-0.
Во полуфиналниот дуел, каратистот на КК Штип го продолжи победничкиот ритам против Гаетано Сортинауло од Италија, кого го совлада со 6-4 во еден од најнеизвесните мечеви на турнирот.
Во големото финале, Џорлев се соочи со Украинецот Иван Маценко и по голема борба успеа да слави со минимални 4-3, со што го потврди златниот медал и го заокружи турнирот без пораз.
Овој успех доаѓа во исклучително силна конкуренција од 2720 каратисти од 69 држави, што уште повеќе ја зголемува тежината на постигнатиот резултат и ја потврдува големата перспектива на големата карате надеж на Македонија.
