Третолигашот Башкими од Јаболчиште гради тим со кој ќе атакува на првата позиција во Трета лига Регион 4, а со тоа преку бараж да обезбеди влез во Втората македонска фудбалска лига.
Тимот од Јаболчиште веќе интензивно работи на градењето на квалитетен ростер, а според досега промовираните играчи се работи за квалитет со кој Башкими сигурно ќе оди по шампионскиот пехар и пласман во повисок ранг на натпреварување.
Третолигашот од Јаболчиште засега се засили со Енди Мандак, Бобан Манчев, Дритон Јонузи, Ермал Рахмани и Јосиф Манасиев, а сигурно е дека и во следниот период ќе бидат промовирани уште неколку играчи со кои ќе се подигне значително квалитетот во сопствените редови.
Мандак доаѓа од редовите на Брегалница од Делчево, а претходно настапуваше за штипска Брегалница од каде и потекнува и за Беласица, се работи за 21-годишен фудбалер од Штип.
Од градот под Исарот доаѓа и Бобан Манчев во редовите на Башкими, 21-годишен фудбалер кој последно го носеше дресот на екс второлигашот Вардар Неготино, а потекнува од штипска Брегалница.
Дритон Јонузи е 22-годишен фудбалер кој има настапи за Врановци и Мартолци.
Голманот Ермал Рахмани ќе го чува голот на Башкими во новата сезона, а пристигнува од редовите на третолигашот Беса од Сарај, каде што покажа квалитет и сигурност меѓу стативите.
Јосиф Манасиев ќе биде квалитетно засилување, станува збор за 26-годишен фудбалер кој пристига од редовите на Превалец, а во минатото го носеше дресот на Борец, Детонит Плачковица, Кожуф и Слога од Виница.
