Татабања обезбеди пласман во финалето на ЕХФ Европскиот Куп, откако во драматичен двомеч го елиминираше Извиѓач.
Иако босанскиот претставник го доби првиот натпревар со 33-31, унгарскиот тим возврати на свој терен со победа од 37-34, што беше доволно за место во големото финале.
Натпреварот започна подобро за гостите, кои во првото полувреме имаа контрола и предност од 15-11. Сепак, Татабања постепено го фаќаше ритамот, ја намали негативата и со погодок во последните секунди пред паузата направи пресврт за водство од 20-19. Во редовите на победничкиот тим, македонскиот репрезентативец Филип Талески се запиша со еден погодок.
Еден од клучните моменти се случи рано во натпреварот, кога Извиѓач остана без својот најрасположен играч Диано Ќешко, кој заработи директен црвен картон по остар прекршок.
Во продолжението, домашниот состав ја зголеми предноста на три гола (22-19), но Извиѓач повторно се врати и израмни на 26-26 по 40 минути игра.
Сепак, во завршницата Татабања беше поконцентрирана и ја искористи паднатата енергија кај противникот за да го потврди триумфот и пласманот во финалето.
Вториот финалист ќе биде познат утре, а надежите на македонската јавност се насочени кон Охрид. Финалните натпревари од ова натпреварување се закажани за 23/24 и 30/31 мај.
