Ракометарите на Вардар 1961 го претрпеа третиот пораз во Лигата на шампионите, откако на домашен терен во СЦ „Јане Сандански“ загубија од полската Висла Плоцк со 26-32. Гостите ја оправдаа фаворитската улога и со цврста одбрана и сигурна игра во нападот заслужено ги освоија бодовите од Скопје.
Полскиот состав уште од почетокот ја презеде контролата врз натпреварот. Вардар имаше проблеми да најде решение за агресивната одбрана на противникот, па Висла постепено ја зголемуваше предноста, која во првото полувреме достигна и шест гола. Сепак, домашните успеаја да се консолидираат во финишот и на паузата заминаа со подносливи 13-15.
Надежите за пресврт се намалија на стартот од вториот дел, кога гостите повторно се одлепија резултатски. Вардар се обидуваше да се врати во игра, но секоја грешка во нападот беше казнета од расположениот ривал. Висла во продолжението ја зголеми предноста и во завршницата рутински го приведе натпреварот до крајот.
Најсветлата точка во домашниот состав беше Матео Фадуил, кој одигра извонреден натпревар и постигна 14 гола, но немаше доволна поддршка од соиграчите. Јака Малус беше следен стрелец кај Вардар со четири погодоци. Кај гостите, Фредерик Бјере се истакна со десет гола.
За „црвено-црните“ ова е трет пораз во исто толку натпревари во елитното европско натпреварување. Новата пресметка со Висла Плоцк следува на 14 октомври, кога македонскиот претставник ќе гостува во Полска и ќе има можност да се обиде да го поправи впечатокот.
