Охрид е на прагот на историски момент – натпревар што може да ја однесе екипата во финалето на ЕХФ Европскиот Куп и да испише нова страница во клупската историја. По минималниот пораз на првиот дуел, сè е отворено, а пред домашна публика, мотивот и вербата се на највисоко ниво.
На денешната прес- конференција, левиот бек на Охрид- Анте Иванковиќ потенцира дека тимот е подготвен за овој предизвик, со добра атмосфера и јасна цел – победа која ќе значи пласман во финалето. Тој нагласува дека одбраната е силната страна на Охрид оваа сезона и дека токму таа може да биде клучна во решавачкиот меч, додека поддршката од трибините ќе има огромно значење.
„Имавме еден меч пред неколку дена, на кој одморавме дел од играчите, но и воигравме некои акции кои ќе ни служат за Целје. Енергијата во екипата е одлична, нè чека историски натпревар, кој едвај чекаме да започне и се надевам дека со атмосфера која му доликува на Охрид, на крилјата на навивачите ќе одиме во финалето. Добрата одбрана нè краси цела оваа сезона и мислам дека и утре ќе биде тоа случај, за да победиме и да го осигураме тоа што го сакаме. Салата е веќе распродадена, што значи дека ќе имаме навивачи во голем број и сакам да им порачам дека ова е натпревар за историјата, за градот и за клубот. Од првата минута треба да навиваат со срце за нас и да ни помогнат да ја оствариме целта“- изјави Иванковиќ.
Со полни трибини и силна верба во сопствените можности, Охрид ќе влезе во мечот со една мисла – да ја искористи шансата и да направи чекор кон европското финале.
