Ракометарите на Вардар го освоија Купот на Македонија, откако во драматично финале во Струмица го совладаа Охрид со 24-23 и стигнаа до 18. трофеј во ова натпреварување. Охриѓани беа на чекор до сензација во историската сезона, но во неизвесен финиш останаа без посакуваниот трофеј.
Десниот бек на Охрид, Давид Савревски, во изјава за Спортска Мрежа истакна дека пропуштените шанси и грешките во клучните моменти биле пресудни за исходот, и покрај големата борба на неговиот тим.
„Честитки до екипата на Вардар за освоениот Куп. Имавме многу грешки и промашени зицери во клучни моменти на крајот и мислам дека тоа го одлучи натпреварот. Навистина штета што не го освоивме Купот во оваа историска сезона за нас, бевме толку блиску, но тоа е.. одиме понатаму и нема време за жалење- за 6 дена играме полуфинале во ЕХФ Купот и се надевам на успех.”- изјави Савревски за Спортска Мрежа.
И покрај поразот, Охрид одигра храбро финале и покажа дека може рамноправно да се носи со најсилните, а фокусот и мислите веќе се насочени кон новиот предизвик – полуфиналето во ЕХФ Купот.
