Ракометарите на Радовиш забележаа нова победа откако во Гевгелија со 25:30 го добија дуелот со Партизан во рамки на 7. коло на Првата лига.
Ланскиот суперлигаш имаше одлично отварање на мечот кога имаше предност од 2:7 но потоа домашниот тим влезе во серија и стигна до 7:9 односно на минус два, а на полувреме гостинот имаше само гол предност 15:16.
Во второто полувреме домашниот тим успеа во целост да го сврте резултатот и имаше предност до 20:19 за прв водство на средбата.
По играта гол за гол и новото водство на домаќинот, гостинскиот тим успеа да направи плус два гола предност при 24:26, а потоа се одлепи и на 24:28 на минута и пол до крајот и тука беа решени сите дилеми, на крајот само потврда на победата од 25:30.
За домашниот тим Илија Пејковски имаше пет гола, а Горан Лисичков и Стојан Наумовски по четири гола. За Радовиш прво име беше Васе Петров со десет гола, а го следеше Стојанче Ристов со осум.
За Радовиш ова е трета сезонска победа и на своето конто има девет бодови и до комплетирање на колото ќе биде на деветтото место, а пак Партизан го забележа четвртиот сезонски пораз и останува на десеттото место со шест бода.
