Гевгелија испиша историја: „Мајсторката“ донесе пласман во Првата лига!

Кошаркарскиот клуб Гевгелија од следната сезона ќе настапува во Прва лига, откако во одлучувачкиот трет натпревар од финалната плеј-оф серија ја совлада екипата на Шар Планина со 67-56 и со вкупни 2-1 обезбеди место во Првата македонска лига.

Во салата „26 Април“ се одигра квалитетен и борбен натпревар, во кој гостите од Гостивар подобро го отворија дуелот и го добија првиот период со 18-15. Сепак, клучниот пресврт се случи во втората четвртина, кога домашниот тим целосно го презеде ритамот на играта. Со одлична одбрана и ефикасен напад, гевгеличани направија серија за комплетен пресврт и на паузата заминаа со убедлива предност од 38-27.

Во второто полувреме Гевгелија не дозволи изненадувања. Контролираше на теренот, особено во дефанзивата, и постепено ја зголемуваше разликата. По три четвртини резултатот изнесуваше 51-36, што практично ги реши дилемите околу победникот.

Најефикасен во победничкиот состав беше Колев со 15 поени, додека Божинов и Старделов постигнаа по 12. Значаен придонес дадоа и Костадинов со 10, како и Лазаревски со осум поени. Кај Шар Планина се истакна Балоски со 23 поени, додека Лаковски додаде 17, а Србиновски 11.

Со оваа победа, Гевгелија го круниса успешниот настап во сезоната и заслужено се избори за прволигашки статус. По натпреварот, пехарот за најдобар тим во Аматерската лига за сезоната 2025/2026 го врачи спортскиот ветеран Томе Хаџи-Митров, во присуство на претседателот на Кошаркарската федерација на Македонија, Томе Главчев.