Силекс продолжува со победничкиот ритам во Првата македонска фудбалска лига. Кратовци на домашен терен ја совладаа Шкендија Арачиново со 2:0, а херој на натпреварот беше Есмир Хасукиќ, кој ги постигна двата гола за својот тим.
Избраниците на Александар Васоски стигнаа до втората последователна победа, откако во претходното коло убедливо славеа на гостувањето кај Башкими во Куманово со 0:3. Со тоа Силекс успешно излезе од резултатската криза и сега ја потврди добрата форма со нов триумф пред домашната публика.
Со освоените три бода, кратовскиот состав стигна до вкупно 16 бода и се искачи на петтото место на табелата, притоа оставајќи ја зад себе токму Шкендија Арачиново, која се соочува со резултатска криза.
Победата е особено важна за Силекс, кој со новите три бода продолжува да се приближува кон екипите од горниот дел на табелата и останува во игра за позициите што водат кон европските натпреварувања.
Со дуелот во Кратово беше отворено 11. коло во Првата македонска фудбалска лига, кое продолжува во текот на викендот со преостанатите натпревари.
