Екипата на Македонија Ѓорче Петров забележа важна победа над Аеродром со 29:26 во рамки на 22. коло од Првата лига, во натпревар кој донесе неизвесност и борба до самиот финиш.
Гостите подобро го отворија мечот и на пауза имаа минимална предност (15:16), но во второто полувреме ѓорчепетровци одиграа поконцентрирано и успеаја да направат резултатски пресврт за нови бодови на своето конто.
Клучна улога во победата имаа Мартин Бучуковски со девет погодоци и Бојан Чакалич со осум, кои беа предводници во офанзивниот дел кај домашниот тим.
Со овој триумф, Македонија ЃП се наоѓа на петтата позиција со 27 бодови, додека Аеродром останува на осмото место со 18 освоени бодови. До крајот на сезоната остануваат уште четири кола, во кои ќе се решава конечниот пласман.
Во врвот на табелата ситуацијата е сè појасна – Мулти Есенс е на чекор до директен пласман во Супер лигата, додека Младост Богданци е во позиција да обезбеди бараж за враќање меѓу елитата.
