Претставници на ракометните сојузи и релевантни клубови од регионот одржаа значаен состанок на кој беше направен сериозен чекор кон унапредување на соработката и подигнување на нивото на ракометот на Балканот.
На средбата во Скопје беше постигната согласност од сезоната 2027/28 да започнат регионални лиги во полн формат, и во машка и во женска конкуренција. Овој проект се смета за ново поглавје во развојот на ракометот, со очекувања за зголемена конкурентност, подобар развој на играчите и поголема атрактивност за публиката.
Според договореното, во женска конкуренција ќе учествуваат по две екипи од пет држави – Словенија, Хрватска, Црна Гора, Србија и Македонија. Во машка конкуренција е предвиден нешто поразличен формат, со по четири клуба од Србија и Македонија, како и по два од Црна Гора.
Како вовед во овој систем, веќе за сезоната 2026/27 е планирано натпреварување во скратен формат, кое ќе послужи како тест-фаза.
Деталите околу организацијата и моделот ќе бидат дополнително прецизирани на следниот состанок, закажан за 20 мај во Подгорица.
Учесниците на состанокот изразија задоволство од постигнатиот договор, потенцирајќи дека регионалните лиги ќе донесат нова енергија, поголем квалитет и подобра промоција на ракометот во регионот.
Со оваа иницијатива се поставуваат темели за стабилен и долгорочно одржлив систем на натпреварување, кој треба да биде во корист на клубовите, играчите и навивачите, но и да го позиционира регионалниот ракомет на уште повисоко ниво.
