Ракометарите на Бутел Скопје ги очекува важен европски предизвик. Македонскиот тим, викендов ќе ја пречека хрватска Горица во реванш-натпреварот од второто коло на ЕХФ Европскиот Куп, со јасна цел – да ја надомести негативата од првиот дуел и да избори пласман во следната рунда.
На првата средба во Хрватска, Горица славеше со 27-24, откако Бутел имаше период во кој ја презеде контролата и поведе со два гола разлика. Сепак, домаќините направија пресврт во финишот и си обезбедија предност од три погодоци пред гостувањето во Скопје.
Сега избраниците на Стојанче Стоилов ќе ја имаат предноста на домашниот терен, каде што ќе мора да одиграат максимално концентрирано и да ја искористат секоја можност за да ја анулираат негативата. Целта е јасна – победа со потребната разлика и продолжување на европската приказна.
Поддршката од трибините може да биде важен фактор во битката за посакуваниот резултат. Влезот за натпреварот е слободен, па Бутел ги повикува навивачите да ја исполнат салата „Расадник“ и да им дадат дополнителен мотив на ракометарите во обидот за европски пресврт.
