Ако за титулата во Прва лига се борат Вардар и Шкендија, за опстанок се тркаат повеќе екипи – вистинска мешаница во долниот дел од табелата, секој бод е вреден злато за да се стигне до опстанок.
Шкупи веќе официјално испадна во Втора лига, но сега треба уште две екипи да ги спакуваат куферите за преселба во ранг подолу. Најмногу загрозени се екипите на Македонија ЃП, Работнички и Пелистер. Многу извесно две од овие екипи ќе испаднат, а една ќе бара опстанок преку бараж.
Македонија ЃП и Работнички се во зоната за директно испаѓање со 25 бодови, а Пелистер е во бараж зоната со 26 бодови. Останатите екипи имаат друга цел, како да се избегне осмото место и да се обезбеди директен опстанок.
Брера Струмица со 33 бодови е осма и се наоѓа во бараж зоната, а пак Арсими е седми со 35 бодови и веќе е во зоната за директен опстанок, како и Башкими кој е шести со 37 бодови, а пак Тиквеш веќе е најсигурен како петти со 40 бодови.
До крајот ќе гледаме борба како Македонија ЃП, Работнички и Пелистер ќе стигнат до бараж позиција. Веќе во следното коло во Битола ќе се соочат Пелистер и Македонија ЃП, поразениот тим од овој меч ќе биде во многу тешка ситуација за опстанок, особено ако загубат „лавовите“.
Брера, Арсими и Башкими ќе бидат во трка за директен опстанок односно да се избегне осмата позиција. Но, секако дека и самиот распоред на екипите може да направи ситуација во која екипа од погорниот дел да заврши и во бараж зоната, бидејќи до крајот во игра се 18 бодови.
