Ракометарите на Еурофарм Пелистер ја оправдаа фаворитската улога и со убедливи 36-21 го совладаа Младост 1977 од Богданци во натпреварот од осмото коло во Суперлигата. Со новите бодови, битолчани во добра форма го очекуваат големото дерби со Вардар 1961, кое ќе се игра во следното коло.
На полувреме Еурофарм Пелистер имаше висока предност од 16-6. Во продолжението домашниот состав ја задржа контролата и без проблеми ја потврди победата.
Филип Кузмановски со седум гола беше најефикасен во победничкиот тим, Цветан Кузманоски постигна шест, додека Серафимов и Атанасијевиќ придонесоа со по пет погодоци. Кај Младост 1977 најрасположен за игра беше Владимир Бојаниќ, кој натпреварот го заврши со осум гола.
По осум одиграни кола, Еурофарм Пелистер има седум победи и едно реми, додека Вардар 1961 е на врвот со максимални осум победи од осум натпревари.
Младост во следното коло против Тиквеш на домашен терен ќе ја бара својата прва сезонска победа.
