Ракометарите на ГРК Охрид вечерва од 18:00 часот ќе го одиграат реванш натпреварот против Олимпијакос во рамките на ЕХФ Европскиот куп, со јасна цел – заверка на историски пласман во полуфиналето.
Македонскиот претставник во првиот натпревар одигран во Грција оствари значајна победа од 26:31, но во таборот на Охрид нема место за опуштање. Тренерот Борис Роjeвиќ потенцира дека предноста од пет гола не гарантира ништо и дека тимот мора максимално сериозно да влезе во реваншот.
Она што дополнително влева оптимизам е атмосферата – СРЦ „Билјанини Извори“ е целосно распродадена, а „рибарите“ ќе имаат огромна поддршка од трибините. Публиката ќе биде вистински ветер во грб за охриѓани во обидот да направат нов исчекор на европската сцена.
Капитенот Гоце Ојлески заедно со стручниот штаб повика на силна поддршка, а љубителите на ракометот одговорија – вечерва Охрид ќе „гори“.
Сѐ е подготвено за голема ракометна вечер, во која ГРК Охрид ќе се обиде да испише нова страница во својата историја и да обезбеди место меѓу најдобрите четири во ЕХФ Европскиот куп.
