Фудбалскиот тим ФК „Карпошово“, составен од спортисти со Даунов синдром и лесна интелектуална попреченост, оствари значаен успех освојувајќи го првото место на Балканското првенство во фудбал за спортисти со Даунов синдром и интелектуални попречености. Натпреварувањето се одржа од 2 до 4 октомври 2026 година во Софија, Бугарија.
На првенството, организирано од Федерацијата за адаптирана физичка активност на Бугарија (ФАПА), настапија тимови од Бугарија, Македонија, Србија и Хрватска. Натпреварите се играа на терените со вештачка трева во рамките на Воената академија „Георги С. Раковски“ во Софија.
Триумфот на ФК „Карпошово“ е потврда за посветеноста, вложениот труд и заедништвото на фудбалерите и стручниот штаб, кои со своите настапи го заслужија највисокото место на победничкиот подиум. Овој резултат има и пошироко општествено значење, бидејќи ја истакнува важноста на инклузијата и создавањето еднакви можности за сите во спортот.
Преку проектот „Фудбал за сите деца“, децата и младите со интелектуални попречености добиваат можност да спортуваат, да ги надградуваат своите фудбалски вештини и да бидат активни членови на спортската заедница. На тој начин, фудбалот станува важна алатка за социјална интеграција, развој на самодовербата и поттикнување на тимскиот дух.
Работата и активностите на ФК „Карпошово“ се поддржани од Фудбалската федерација на Македонија (ФФМ) и Фондацијата на УЕФА за деца, кои придонесуваат за промовирање на инклузивниот спорт и обезбедување подобри услови за учество на лицата со попреченост.
Успехот во Софија претставува уште еден значаен чекор во промоцијата на инклузијата преку спортот и потсетник дека фудбалот е игра што ги поврзува луѓето, ги надминува разликите и им дава можност на сите да ги покажат своите способности и да ги остваруваат своите цели.
