Ракометарите на Алкалоид со убедливо издание ја потврдија фаворитската улога против Струга и впишаа нови бодови во домашниот шампионат. Скопскиот тим славеше со 33-22 (16-8), враќајќи се на победничките патеки по поразот од Охрид и со позитивна атмосфера го очекува првиот европски предизвик сезонава.
Избраниците на Кирил Лазаров од самиот почеток ја презедоа контролата врз случувањата на теренот. По почетната резултатска неизвесност, Алкалоид ја зацврсти одбраната, пронајде решенија во нападот и со серија од пет последователни погодоци направи значителна разлика. Домаќините на паузата заминаа со убедливи 16-8, а во продолжението без поголеми проблеми ја одржуваа предноста и рутински го приведоа натпреварот до крај.
Никола Костески беше најрасположен во нападот на Алкалоид со шест погодоци, додека Дамјан Митев и Монси Тордарсон постигнаа по пет гола. Значаен придонес имаше и голманот Иван Галевски, кој запиша 15 одбрани. Кај стружани, Шилегов се истакна со пет реализации, а Мартин Манасков и Родиќ постигнаа по четири гола.
Со овој триумф, Алкалоид ја забележа шестата победа по седум одиграни кола во Суперлигата и останува веднаш зад максималниот Вардар 1961. Сега вниманието на тимот се насочува кон европската сцена и двомечот со австрискиот Келаг Ферлах во ЕХФ Европскиот Куп. Првиот натпревар ќе се одигра на 17 октомври, од 19:00 часот, во салата „Автокоманда“, каде што избраниците на Лазаров ќе имаат можност успешната домашна серија да ја пренесат и во европскиот предизвик.
