Министерот за спорт, Борко Ристовски, вчера присуствуваше на прес-конференцијата по повод одржувањето на „FNC 34 Fight Nation Championship“, првиот настан на една од најголемите ММА организации во Европа на македонско тло. Настанот ќе се одржи на 24 октомври во спортскиот центар „Борис Трајковски“ во Скопје, а организатор е Македонската ММА федерација, со поддршка од Министерството за спорт.
Ристовски ја истакна поддршката за ваквите спортски проекти, нагласувајќи дека тие придонесуваат за развојот и промоцијата на спортот, но и за афирмација на Македонија како дестинација за одржување големи спортски настани.
„Министерството за спорт секогаш ќе дава поддршка на вакви проекти кои го промовираат спортот и Македонија. Мислам дека ова ќе биде голем и убав спектакл и ќе гледаме квалитетни борби кои ќе го промовираат спортот, но ќе ја промовираат и Македонија како спортска дестинација“, истакна министерот Ристовски.
Организацијата „Fight Nation Championship“ за првпат доаѓа во Македонија, а големиот интерес за ММА борбите отвора можност за долгорочна соработка и организирање нови настани во иднина.
Основачот и претседател на ФНЦ, Дражен Форгач, посочи дека одлуката за доаѓање во Скопје е поттикната и од големиот број фанови од Македонија кои со нетрпение очекуваат да присуствуваат на овој спортски спектакл.
„По повик од многубројни фанови од Македонија, ФНЦ доаѓа по првпат во Скопје. Многу веројатно не сме последен пат овде. Доаѓаме со сериозни борби, ние сме во подем, растеме секој ден. Гледачите ќе можат четири до пет часа да уживаат во спектакуларни борби“, изјави Форгач.
На настанот „FNC 34 Fight Nation Championship“ Македонија ќе биде претставена со петмина борци. Македонската ММА федерација ќе ја претставуваат Даниела Алексовска, Марко Трајановски, Тоше Цветков, Ален Амедовски и Дино Старчевиќ.
На програмата се предвидени вкупно 11 борби, а главниот дуел на вечерта ќе биде пресметката меѓу Лом-Али Ескиев и Марко Бојковиќ, во која Ескиев ќе ја брани титулата во лесна категорија.
Со доаѓањето на ФНЦ во Скопје, македонската публика ќе има можност да проследи квалитетни ММА пресметки и да ги поддржи домашните борци на големата европска сцена.
