ГРК Охрид е на чекор до историски успех во ЕХФ Европскиот куп, а пред реваншот против Олимпијакос, голманот на охриѓани- Бојан Блажески во изјава за Спортска Мрежа го најави клучниот натпревар и ги истакна очекувањата во таборот на „гладијаторите“.
Блажески посочува дека Охрид има солидна предност по првиот натпревар, во кој тимот одиграл квалитетно и дисциплинирано. Тој нагласува дека и покрај позитивниот резултат, реваншот мора да се одигра со максимална концентрација, како да се тргнува од почеток.
Голманот ја издвојува одбраната како клучен фактор за успех, исто како и во првиот дуел, а предупредува дека најголемата закана од противникот доаѓа преку играта „седум на шест“. Воедно, упатува повик до публиката да ја исполни салата и да даде силна поддршка.
„Имаме солидна предност со екипата на Олимпијакос и одлично одговоривме на првиот дуел. Бевме подготвени одлично. Атмосферата беше одлична, без проблеми и ни беше обезбедено сè за одличен престој. Во вториот натпревар мораме да започнеме сè од 0. Одбраната ќе биде клучна, како и во првиот меч и најголемата опасност доаѓа во нивната игра „7 на 6“. Во сабота да ја наполниме „Билјанини извори“ и заедно да уживаме во овој историски успех!“ – порача Бојан Блажески за Спортска Мрежа.
Со предност од првиот натпревар, но и со јасна свест за предизвикот што следи, Охрид ќе влезе максимално фокусирано во реваншот. Поддршката од трибините може да биде клучниот фактор во битката за историски пласман.
