Македонскиот интернационален фудбалски судија Игор Стојчевски објави дека се повлекува од судењето, посочувајќи ги притисоците и, како што наведува, невистините што се шират за него во јавноста. Одлуката ја соопшти преку социјалните мрежи, потврдувајќи дека веќе ги информирал надлежните во Фудбалската федерација на Македонија (ФФМ).
Стојчевски во изминатиот период беше во центарот на вниманието по пријателскиот натпревар меѓу младинските репрезентации на Македонија и Русија, одигран во Скопје, кој заврши со победа на гостите од 3:2. Средбата предизвика реакции поради досудените пенали, а судиските одлуки беа предмет на критики и коментари во јавноста.
Во своето обраќање, Стојчевски нагласи дека во овој момент сака да му посвети повеќе време на семејството и дека не сака неговите најблиски да бидат погодени од она што го оценува како невистини и манипулации. Тој потврди дека за својата одлука ги известил претседателот на ФФМ, претседателот на судиската организација и комесарот за делегирање.
„Ги информирав претседателот на ФФМ и претседателот на судиската организација, како и комесарот за делегирање дека немам намера повеќе да судам. Сакам да бидам со моето семејство во овие тешки семејни времиња и не сакам да дозволам да страдаат моите најблиски поради невистини и манипулации што се шират во јавноста од осудувани криминалци“, вели Игор Стојчевски во објава на социјалните мрежи.
Повлекувањето доаѓа во период кога Стојчевски имаше можност за понатамошен професионален развој на меѓународната сцена. Во април годинава тој беше избран за учесник во програмата на УЕФА за талентирани судии и менторство за актуелната сезона.
