Во сабота на програмата се натпреварите од 23. коло во Втората македонска лига, кои стандардно се закажани за 15:30 часот. Сепак, дуелот на стадионот „Билјанини Извори“ ќе започне два часа порано.
Како што ексклузивно дознава Спортска Мрежа, натпреварот меѓу Охрид и Новаци ќе се игра со почеток од 13:30 часот. Причината за оваа промена е реванш средбата на ракометниот клуб Охрид против Олимпијакос од Грција, која ќе се одигра во спортската сала во Охрид од 18:00 часот.
Според нашите информации, одлуката е донесена во координација меѓу фудбалскиот клуб Охрид и надлежните институции, односно Министерството за внатрешни работи и СВР Охрид. Целта е натпреварот да заврши навреме, со што ќе се овозможи соодветна организација и безбедност за ракометниот дуел.
Со оглед на тоа што спортската сала се наоѓа во непосредна близина на стадионот, ваквата одлука е донесена од безбедносни причини.
Фудбалерите на Охрид на овој натпревар ќе бараат рехабилитација по поразот од Брегалница во Штип, додека ракометарите ги очекува важен европски предизвик – борба за нов триумф против Олимпијакос и пласман во полуфиналето на ЕХФ Европскиот Куп.
