ГРК Охрид е на чекор до ново историско достигнување на европска сцена, а пред клучниот реванш против Олимпијакос, од клубот испратија јасна порака до јавноста – салата „Билјанини извори“ да биде вистински ветер во грб за „гладијаторите“.
Охрид славеше на првата пресметка од четвртфиналето на ЕХФ Европскиот куп против Олимпијакос на гостински терен со 31-26 и со тоа направи голем чекор кон пласман во ТОП 4.
Сепак, и покрај предноста, во таборот на охриѓани владее претпазливост, со јасна порака дека работата сè уште не е завршена и дека претстојните 60 минути на домашен терен ќе бидат пресудни.
Во пресрет на реваншот, а имајќи ги предвид случувањата од минатата сезона во финалето меѓу тим од Автокоманда и АЕК Атина, двете екипи постигнаа договор натпреварите да минат без присуство на гостински навивачи, и во Атина и во Охрид.
Токму затоа, од ГРК Охрид упатија апел за фер, спортска и достоинствена атмосфера, со силна поддршка од домашната публика.
,,Почитувани охриѓани, симпатизери, навивачи и љубители на ракометот!
ГРК Охрид за градот од коло во коло на Европската сцена пишува историја! Одигравме одличен натпревар во Атина и се вративме како победници. Но, имаме уште 60 минути на домашен терен.
Бевме одлично примени од екипата на Олимпијакос и натпреварот помина во одлична ракометна атмосфера. Ја повикувам публиката, симпатизерите и навивачите во сабота да бидат 8-от играч на ГРК Охрид и ветер во грб на нашите гладијатори. Ве молам со фер и најкоректно навивање и поддршка за нашите момци да му помогнете на клубот. Транспарентите во преполната сала Билјанини Извори да бидат исклучиво за поддршка на нашиот клуб и Македонија, да ја оставиме политиката настрана и да му помогнеме на нашиот град да испишува историја!”– порача спортскиот директор на ГРК Охрид, Славчо Ристески.
Со предност од првиот натпревар и поддршка од домашната публика, Охрид има идеална можност да ја круниса европската приказна. Остануваат уште 60 минути во кои „гладијаторите“ ќе се обидат да го направат последниот чекор кон полуфинале и нова страница во клупската историја.
