Македонската А репрезентација продолжува со подготовките за следниот предизвик – гостувањето кај Република Ирска на 31 март во Даблин. По натпреварот со Данска, репрезентативците се целосно фокусирани на анализа на грешките и подигнување на формата пред новиот предизвик.
Љупче Дориев истакна дека тимот прикажал квалитетна игра во првото полувреме против Данска, но дека еден неочекуван момент значително влијаел врз текот на натпреварот и конечниот исход. Тој потенцира дека ваквите ситуации се составен дел од фудбалот, но и дека тимот мора да извлече поука и да остане концентриран во текот на сите 90 минути.
Во пресрет на дуелот со Ирска, атмосферата во репрезентацијата е позитивна, а играчите се мотивирани да го дадат максимумот и да дојдат до поволен резултат на тешкото гостување во Даблин.
„Мислам дека одигравме многу добро прво полувреме против Данска, но потоа се случи еден брз и неочекуван гол. Тоа беше на самиот почеток на второто полувреме и малку нè дестабилизираше. Се виде дека влеговме во шок и кратка деконцентрација, што противникот го искористи. Станува збор за квалитетна репрезентација, но од наша страна продолжуваме понатаму.
Нè очекува натпревар со Ирска и треба да гледаме напред, со кренати глави и со атмосфера на највисоко ниво. Верувам дека нè очекуваат добри натпревари. Ова е само почеток. Натпреварот со Данска беше прв со нов селектор, со нова визија и пристап. Имаме квалитет, само треба да го склопиме во целина“, изјави Дориев.
