Женската репрезентација на Македонија до 19 години забележа победа од 3:1 против соодветната селекција на Косово во вториот контролен натпревар меѓу двете репрезентации.
Избраничките на селекторот Кирил Изов одлично го отворија натпреварот и поведоа уште во петтата минута со голот на Меланија Грозданова. Сепак, Косово успеа да се врати во игра, откако Олса Мачастена во 42. минута погоди за израмнување на 1:1, резултат со кој се замина на паузата.
Во второто полувреме, македонските фудбалерки повторно ја презедоа предноста. Во 56. минута Теона Галабовска ја затресе противничката мрежа за водство од 2:1. Конечниот резултат го постави Меланија Грозданова, која со својот втор погодок на натпреварот во 89. минута ја потврди победата на Македонија од 3:1.
На првиот контролен дуел, кој се одигра во Приштина, двете селекции ремизираа со 1:1. Стрелец на единствениот гол за Македонија на тој натпревар беше Јована Каралиоска.
Со победата на вториот натпревар, младата женска репрезентација на Македонија до 19 години ја заврши контролната серија против Косово со позитивен резултат.
