Брера Струмица запиша значајна гостинска победа над Башкими (0-2) во рамки на 20. коло од Прва македонска фудбалска лига и направи важен чекор во битката за опстанок.
По поразот од Работнички во минатото коло, избраниците на Мартин Алаѓозовски реагираа на вистински начин и се вратија на победничките патеки, освојувајќи три злато вредни бодови во Куманово.
Првото полувреме не понуди многу возбудувања, најчесто се играше меѓу двата шеснаесетници, со претпазлива игра од двете страни. Сепак, во самиот финиш од првиот дел струмичани го зададоа ударот. Во 44. минута Мите Тодоров испрати прецизна топка во простор, а Зоран Ивановски одлично реагираше, излезе сам пред голманот Јашар и сигурно реализираше за водство од 0-1.
Во вториот дел Башкими ја презеде иницијативата и тргна по израмнување. Мемети ја погоди стативата во 69. минута, а сериозно се закани и Аворнио со удар од работ на шеснаесетникот. Сепак, голманот Даниел Диковски беше на висина на задачата и со неколку интервенции ја сочува предноста на својот тим. Обид имаше и Личина, но мрежата на гостите остана мирна.
Кога домашните не ги искористија своите шанси, следуваше казна. Во судиското продолжение, во 93. минута, нововлезениот Никола Величковски стави точка на натпреварот, погодувајќи за конечни 0-2.
Со оваа победа Брера стигна до 26 бодови, исто колку и денешниот ривал, и јасно покажа дека сериозно ќе се бори за задржување на прволигашкиот статус. Во следното коло струмичани ги очекува тежок домашен предизвик против Струга Трим Лум, додека Башкими ќе гостува кај Шкупи во обид за поправка на впечатокот.
