Ракометарите на Охрид продолжија во победнички ритам и на гостувањето кај Прилеп славеа убедливо со 34-18, потврдувајќи дека европскиот замав успешно го пренесуваат и во домашното првенство.
Охриѓани уште од самиот почеток ја презедоа контролата врз играта, поведоа со 4-1, а до полувремето веќе имаа недостижни 19-10. Во вториот дел избраниците на Борис Ројевиќ ја задржаа дисциплината, ротираа со составот и рутински ја приведоа средбата до крај.
Еден од најрасположените поединци од таборот на Охрид, Кукуловски, по натпреварот, за Спортска Мрежа, изјави:
,, Прво, сакам да упатам честитки до екипата на Прилеп, за фер и коректната игра. Одигравме еден одличен натпревар, се држевме до договореното и брзо се одлепивме. Немавме многу проблеми, како во нападот, така и во одбраната.. ротиравме доста и игравме дисциплинирано. Секој од играчите го даде максимумот на терен и сметам дека резултатот си дојде сам по себе. “
Покрај Кукуловски, кој постигна шест погодоци, се истакнаа и Савревски со седум и Ѓукиќ со пет гола. Кај прилепчани, најефикасен беше Шабановиќ со четири реализации.
Во следното коло, охриѓани ќе го пречекаат Куманово, додека Прилеп ќе гостува кај Тиквеш во Кавадарци.
