Одбојкарската федерација на Македонија ќе биде домаќин на два квалификациски турнири за Европското првенство 2027 во конкуренција до 20 години, еден во машка и еден во женска конкуренција. Скопје ќе биде центарот на европската младинска одбојка во јануари следната година.
Машкиот турнир од втората фаза на квалификациите, во рамки на групата Е, ќе се одржи од 14 до 17 јануари 2027 година, додека женските селекции до 20 години ќе се натпреваруваат во истиот град од 21 до 24 јануари, исто така во групата Е.
Покрај Македонија, Европската одбојкарска конфедерација (ЦЕВ) ги одреди и останатите домаќини на квалификациските турнири. Кај мажите, организацијата им е доверена на Италија (група А), Полска (група Б), Португалија (група Ц) и Луксембург (група Д). Во женска конкуренција, домаќини ќе бидат Србија (група А), Хрватска (група Б), Бугарија (група Ц) и Летонија (група Д).
Машката и женската репрезентација на Македонија до 20 години настапија на БВА зонските квалификации во средината на август годинава, кои претставуваа прва фаза од евро-квалификацискиот циклус. Во втората рунда ќе настапат балканските селекции кои не успеаја да обезбедат директен пласман на континенталниот шампионат.
